Қәдирли дослар! Бәринен бурын, сиз, әзизлерди, тараўдың раўажланыўына бүгин де мүнәсип үлес қосып киятырған ҳүрметли ветеранларды Баспасөз ҳәм ғалаба хабар қураллары күни байрамы менен шын кеўилден қутлықлап, барлығыңызға өзимниң жоқары ҳүрметим ҳәм ең жақсы тилеклеримди билдиремен. Биз ғалаба хабар қураллары хызметкерлери тымсалында өзиниң терең билим ҳәм тәжирийбеси, бийбаҳа талант ҳәм шеберлигин халқымыздың мәлимлеме тараўындағы конституциялық ҳуқықларын тәмийинлеў, мәмлекетимизде инсан қәдирин улығлаў, адамлардың ақыл-ойын жоқарылатыў, жәмийетимизде ашықлық орталығын беккемлеў, глобал мәлимлеме мәканында миллий мәплеримизди қорғаўдай уллы ислерге бағышлаған жанкүйер ҳәм мийнеткеш инсанларды көремиз. Жанажан Өзбекстанымыз өз раўажланыўының жаңа ҳәм әҳмийетли басқышына қәдем қойып атырған ҳәзирги дәўирде медиа тараўының ўәкиллери – журналист ҳәм редакторлар, режиссёр ҳәм операторлар, блогерлер, теле-радио каналлар, газета ҳәм журналлар, редакция ҳәм баспахана хызметкерлери Ўатанымыздың демократиялық келбетин қәлиплестириў, оны дүньяға ен жайдырыўға шексиз үлес қосып киятырғанын ел-халқымыз жақсы биледи ҳәм жоқары қәдирлейди. Ҳүрметли ўатанласлар! Кейинги жыллары мәмлекетимизде ғалаба хабар қуралларын халық пенен қарым-қатнастың исенимли көпирине айландырыў, заманагөй мәлимлеме хызметлери базарын, саламат бәсекини раўажландырыў, медиа тармақларының материаллық-техникалық базасын беккемлеў, устаз-шәкирт дәстүрлерин күшейтиў, тараў хызметкерлериниң машақатлы мийнетин мүнәсип хошаметлеў бойынша кең көлемли жумыслар әмелге асырылмақта. Мине, усындай, жоқары итибар себепли елимизде ғалаба хабар қуралларының саны 2016-жылға салыстырғанда дерлик 30 процентке артып, 1962 ге жеткени дыққатқа ылайық. Әсиресе, жеке меншик медиа қураллары турмысымыздан кең орын ийелеп баратырғаны жәмийетимизде пикирлердиң ҳәр қыйлылығын тәмийинлеўде, түпкиликли реформаларды әмелге асырыўда, орынларда жол қойылып атырған кемшиликлер менен машқалаларды исенимли көтерип шығыўда әҳмийетли фактор болмақта. Бул ҳаққында сөз болғанда, телевидение ҳәм Интернет тармағын интеграциялаў мақсетинде заманагөй интернет платформасы ҳәм оның мобиль қосымшасының шөлкемлескени, миллий мәлимлеме мәканымызда интернет баспаларының саны кейинги 6 жылда дерлик еки есеге көбейип, 677 ге жеткенин айрықша атап өтиў зәрүр. Нәтийжеде мәмлекетлик ҳәм мәмлекетлик емес шөлкемлердиң мәлимлеме дәреклери және де артып, халық пенен тиккелей қарым-қатнас жасаў, адамларды ойландырып атырған машқалаларға жеделлик пенен мүнәсибет билдириў, ҳәр қыйлы темаларда ашық-айдын, әдил ҳәм сын көзқарастан пикир билдириўде үлкен имканиятлар пайда болмақта. Мәлимлеме тараўында муғдар көрсеткишлерин сапа көрсеткишлерине айландырыў, миллий журналистикамыздың раўажланыўын жаңа басқышқа алып шығыў – алдымызда турған әҳмийетли ўазыйпа болып есапланады. Өзбекстан медиа компаниялары да жәҳән мәлимлеме майданында мүнәсип орын ийелеп, глобал сиясий-жәмийетлик процесслерде белсене қатнасыўға умтылмақта. Оның ушын тынымсыз мийнет етиў, алдыңғы сырт ел тәжирийбелери, заманагөй мәлимлеме технологиялары, ҳәр қыйлы таллаў усылларын өзлестирип, турақлы изленип жасаў, миллий журналистикамыздың жаңа әўладын тәрбиялаў зәрүр. Жаңа Өзбекстанның раўажланыў стратегиясында өз көринисин тапқан бундай жоқары шеклерге ерисиў ушын бизде барлық ресурс ҳәм потенциал бар. Пуқараларымыз ушын мәлимлеме тараўында қолайлы имканиятлар жаратыў, мәмлекетлик ҳәкимият ҳәм басқарыў уйымларының жумысы үстинен жәмийетлик қадағалаўды әмелге асырыўда ғалаба хабар қуралларының роли ҳәм тәсирин күшейтиў – және бир тийкарғы ўазыйпамыз. Соны атап өтиў зәрүр, тараўдың материаллық-техникалық базасын жақсылаў, хызметкерлердиң мийнетин хошаметлеўге буннан былай да турақлы итибар қаратамыз. Ғалаба хабар қуралларын қоллап-қуўатлаў ҳәм журналистика тараўын раўажландырыў бойынша күни кеше қабыл етилген Президент қарары бул бойынша әҳмийетли қәдем болды. Оған бола, ғалаба хабар қуралларының нызамлы мәплерин қорғаўды күшейтиў, кадрлар потенциалын ҳәм бәсекиге шыдамлылығын және де арттырыў, жәрдемге мүтәж ҳәм жас журналистлерди турақ жай менен тәмийинлеў бойынша зәрүр илажлар әмелге асырылады. Сондай-ақ, усы жылы Қарақалпақстан Республикасы, барлық ўәлаят орайлары ҳәм Ташкент қаласында Баспасөз үйлериниң жағдайы сын көзқарастан үйренип шығылып, жаңа имаратлар қурыў бойынша зәрүр илажлар көриледи. Ҳәммемизге белгили, дүньяда тән алынған демократиялық нормаларға бола, баспасөз еркинлиги – барлық пуқаралық ҳәм сиясий ҳуқықлар арасында айрықша әҳмийетке ийе. Әлбетте, бул тараўда жетискенликлер менен бирге еле машқалаларымыз да жоқ емес. Кейинги ўақытта социаллық тармақлар арқалы айырым орынларда ғалаба хабар қуралы хызметкерлерине менсинбей қараў, олардың өз ўәкиллиги шеңберинде еркин жумыс алып барыўына тосқынлық етиў жағдайларының ушырасып атырғаны ҳаққында хабарлар тарқалып атырғаны да бул пикирди тастыйықлайды. Сол мүнәсибет пенен және бир мәрте атап өтпекшимен: биз қурып атырған ҳуқықый демократиялық мәмлекетте сөз ҳәм баспасөз еркинлиги бәрқулла Бас нызамымыз ҳәм Президент қорғаўында болады. Ғалаба хабар қураллары хызметкерлериниң өз жумысын нызам шеңберинде еркин әмелге асырыўына тосқынлық етиў – бул демократиялық реформаларымызға қарсы ҳәрекет, мәмлекетимиздиң абырайына зыян жеткериў сыпатында баҳаланыўы керек. Суд ҳәм прокуратура уйымлары бизге улыўма жараспайтуғын бундай унамсыз жағдайлар бойынша қатаң илажлар көриўи зәрүр. Бир ҳақыйқатты ҳеш қашан естен шығармаўымыз керек: барлығымыз демократия деп аталған уллы мектептиң оқыўшыларымыз. Бул бойынша еле көп затларды үйрениўимиз зәрүр. Перзентлеримизди мине, усы руўхта тәрбиялаўда журналистика тараўы ўәкиллери, ҳүрметли ветеранларымыз өзлериниң бай тәжирийбеси ҳәм ибратлы пазыйлетлери менен айрықша үлги көрсетеди деп, исенемен. Ҳүрметли ғалаба хабар қураллары хызметкерлери! Бүгинги байрам мүнәсибети менен тараў пидайыларынан бир топары мәмлекетимиздиң жоқары сыйлықлары менен сыйлықланғаны, сөзсиз, барлық дөретиўшилерди жаңадан-жаңа шеклерге илҳамландырып, оларға үлкен күш-ғайрат бағышлайды. Пурсаттан пайдаланып, сиз, әзиз дөретиўши халқын қутлы байрамыңыз бенен және бир мәрте шын кеўлимнен қызғын қутлықлап, ҳәммемиңизге саў-саламатлық, дөретиўшилик жумысыңызда үлкен жетискенликлер, шаңарақларыңызға тынышлық-қәтержамлық, бахыт-ығбал ҳәм қут-берекет тилеймен. Шавкат Мирзиёев, Өзбекстан Республикасы Президенти.

Өзбекстан Республикасы Президентиниң қарары

(Даўамы. Басы 2-бетте)
2023-2024-жылларда 50 журналист ҳәм редакция хызметкерлери сырт мәмлекетлерге маманлық арттырыў, тәжирийбе үйрениў, стажировка өтеў ҳәм абырайлы медиа илажларда қатнасыў ушын жибериледи ҳәм олар ушын сырт елли маман қәнигелер тартылған ҳалда оқыў курслары шөлкемлестириледи. Бул бағдардағы тийисли қәрежетлер Өзбекстан Журналистлер аўқамына Мәмлекетлик бюджеттен ажыратылатуғын қаржылар ҳәм нызамшылық ҳүжжетлери менен қадаған етилмеген басқа да дәреклер есабынан қапланатуғыны белгиленсин.
Қарақалпақстан Республикасы Министрлер Кеңеси ҳәм ўәлаятлардың ҳәкимликлери ҳәр жылы Өзбекстан Журналистлер аўқамының тийисли аймақлық бөлимлериниң жумысын нәтийжели шөлкемлестириў, сақлаў қәрежетлерин қаплаў ҳәм материаллық-техникалық базасын беккемлеў ушын жергиликли бюджеттиң қосымша дәреклери есабынан белгиленген тәртипте субсидия сыпатында қаржы ажыратып барыў илажларын көрсин.
8. Журналистлердиң нызамлы мәплери менен ҳуқықларын қорғаў системасын буннан былай да күшейтиў мақсетинде Өзбекстан Журналистлер аўқамының төмендегилерди аўқам тәрепинен әмелге асырыў ҳаққындағы усыныслары мақуллансын:
журналистлер ҳәм мәмлекетлик уйымлар, физикалық ҳәм юридикалық тәреплер арасында жүзеге келген келиспеўшиликлердиң судқа шекем шешилиўине жәрдемлесиў;
журналистлердиң профессионал жумысына байланыслы жынаят ислери бойынша жумыс алып барыўда олардың жәмийетшилик қорғаўшылары сыпатында нызамда белгиленген тәртипте қатнасыў;
теле ҳәм радиоканаллардың көркем кеңеслериниң жумысына тартылған маман экспертлерди Өзбекстан Журналистлер аўқамына Мәмлекетлик бюджеттен ажыратылған қаржылар есабынан турақлы түрде хошаметлеп барыў.
9. Өзбекстан электрон ғалаба хабар қураллары миллий ассоциациясы жоқары уйымының қарары менен Өзбекстан электрон ғалаба хабар қураллары миллий ассоциациясы Өзбекстан Миллий медиа ассоциациясы деп қайта аталғаны мағлыўмат ушын қабыл етилсин.
Өзбекстан Миллий медиа ассоциациясы тәрепинен усыныс етилген медиа жойбарларды әмелге асырыў режелерине муўапық министрликлер, уйымлар, шөлкемлер ҳәм ҳәкимликлерге олардың бюджеттен тысқары қаржылары ҳәм нызамшылық ҳүжжетлери менен қадаған етилмеген басқа да дәреклер есабынан шәртнама тийкарында медиа өнимлер жаратыў, оларды реализациялаў ҳәм басқа да медиа жойбарларды әмелге асырыўға рухсат берилетуғыны белгиленсин.
10. Олий Мажлис жанындағы Мәмлекетлик емес коммерциялық емес шөлкемлерди ҳәм пуқаралық жәмийетиниң басқа да институтларын қоллап-қуўатлаў жәмийетлик фондының қаржыларын басқарыў бойынша Парламентлик комиссияға ғалаба хабар қураллары ушын грантлар, социаллық буйыртпалардың саны ҳәм муғдарын арттырып барыў ҳәм бул бағдарда өз алдына таңлаўлар өткериў усыныс етилсин.
11. Мәлимлеме технологиялары ҳәм коммуникацияларын раўажландырыў министрлиги (Ш.Х.Шерматов) Әдиллик министрлиги (Р.Қ.Давлетов), Қаржы министрлиги (Т.А.Ишметов), Мәлимлеме ҳәм ғалаба коммуникациялар агентлиги (А.А.Ходжаев) менен биргеликте үш ай мүддетте телерадиоеситтириўлерди тарқатыў (көрсетиў) тармақларын жойбарлаў ҳәм қурыў, телерадиоеситтириўлерди тарқатыў (көрсетиў) тармақларынан пайдаланыў және оларға хызмет көрсетиў ушын белгиленген мәмлекетлик бажы муғдарын 50 процентке шекем азайтыў ҳәм оны жыл даўамында бөлип-бөлип төлеўди енгизиўди нәзерде тутатуғын нызам жойбарын ислеп шықсын ҳәм белгиленген тәртипте Министрлер Кабинетине киргизсин. Онда, төмендегилер ушын мәмлекетлик бажының өз алдына муғдарлары нәзерде тутылады:
телерадиоеситтириўлерди тарқатыў (көрсетиў) тармақларын жойбарлаў ҳәм қурыў;
мәмлекет көлеминде телерадиоеситтириўлерди тарқатыў (көрсетиў) ямаса аймақлық телерадиоеситтириўлерди тарқатыў (көрсетиў);
радиоеситтириўлерди тарқатыў.
12. Ташкент қаласы, Мирабад районы, Матбуотчилар көшеси 32-үй мәнзилинде жайласқан «Баспасөз үйи» имарат ҳәм объектлери Өзбекстан Миллий мәлимлеме агентлигине оператив басқарыў ҳуқықы тийкарында берилсин.
Усы имаратқа күнделикли баспа басылымларының редакциялары ижара ҳақын төлеместен (коммуналлық төлемлер ҳәм көрсетилетуғын басқа да хызметлер буған кирмейди) жайластырыў мүмкин екени белгиленсин.
13. Ташкент қаласы ҳәкимлиги (Ж.А.Артикходжаев) Қурылыс министрлиги (Б.И.Закиров), Экономикалық раўажланыў ҳәм кәмбағаллықты қысқартыў министрлиги (А.М.Бобоев), Қаржы министрлиги (Т.А.Ишметов) менен биргеликте:
усы қарардың 12-бәнтинде келтирилген имарат ҳәм объектлер және оларға тутас аймақта заманагөй медиа қалаша шөлкемлестириўге байланыслы қәрежетлерди 2022-2024-жылларда Өзбекстан Республикасының социаллық ҳәм өндирислик инфраструктурасын раўажландырыў бағдарламасына киргизсин;
усы жойбар бойынша жойбарлаў-смета ҳүжжетлерин таярлаў ушын 2022-2024-жылларда Өзбекстан Республикасының социаллық ҳәм өндирислик инфраструктурасын раўажландырыў бағдарламасы шеңберинде жумсалған ҳәм өзлестирилмеген қаржылар есабынан жетерли муғдарда қаржы ажыратыў илажларын көрсин.
Заманагөй медиа қалаша жойбары жуўмағына жеткерилгенге шекем Өзбекстан Миллий мәлимлеме агентлиги өз жумысын Ташкент қаласы, Мирабад районы, Буюк Турон көшеси, 42-үй мәнзилинде жайласқан имаратта даўам еттирсин.
14. 2022-2023-жылларда ғалаба хабар қуралларын қоллап-қуўатлаў ҳәм журналистика тараўын буннан былай да раўажландырыў илажлары бағдарламасы қосымшаға муўапық тастыйықлансын.
Министрликлер ҳәм уйымлар, Қарақалпақстан Республикасы Министрлер Кеңеси, ўәлаятлар ҳәм Ташкент қаласы ҳәкимликлериниң басшылары бағдарламада белгиленген ўазыйпалардың өз ўақтында ҳәм сапалы орынланыўы ушын жеке жуўапкер екени көрсетип өтилсин.
15. Мәлимлеме ҳәм ғалаба коммуникациялар агентлиги (А.А.Ходжаев) мәпдар министрликлер ҳәм уйымлар менен биргеликте үш ай мүддетте нызамшылық ҳүжжетлерине усы қарардан келип шығатуғын өзгерислер ҳәм қосымшалар ҳаққында Министрлер Кабинетине усыныслар киргизсин.
16. Өзбекстан Республикасы Президентиниң 2017-жыл 9-августтағы «Өзбекстан дөретиўшилерин қоллап-қуўатлаў «Илҳам» жәмийетлик фондын шөлкемлестириў ҳаққында»ғы ПҚ-3184-санлы қарары 2-бәнтиниң үшинши абзацындағы, 5-бәнтиниң екинши абзацындағы, 10-бәнтиндеги ҳәм қарарға 1-қосымшаның он бесинши абзацындағы тийисли келисимдеги «Журналистлер дөретиўшилик аўқамы» сөзлери тийисли келисимдеги «Журналистлер аўқамы» сөзлери менен алмастырылсын.
17. Өзбекстан Республикасы Президентиниң 2017-жыл 10-августтағы «Өзбекстан Журналистлери дөретиўшилик аўқамының жумысын буннан былай да жетилистириў илажлары ҳаққында»ғы ПҚ-3195-санлы қарары өз күшин жойытқан деп есаплансын.
18. Усы қарардың орынланыўын нәтийжели шөлкемлестириўге жуўапкер ҳәм жеке жуўапкер етип Өзбекстан Республикасы Бас министриниң орынбасары А.А.Абдухакимов ҳәм Мәлимлеме ҳәм галаба коммуникациялар агентлиги директоры А.А.Ходжаев белгиленсин.
Қарардың орынланыўын додалап барыў, орынлаў ушын жуўапкер уйымлардың жумысын муўапықластырыў ҳәм қадағалаў Өзбекстан Республикасының Бас министри А.Н.Ариповқа ҳәм Өзбекстан Республикасы Президенти Администрациясы басшысының орынбасары – Өзбекстан Республикасы Президентиниң баспасөз хаткери Ш.И.Асадовқа жүкленсин.
Өзбекстан Республикасы
Президенти Ш.МИРЗИЁЕВ
Ташкент қаласы, 2022-жыл 27-июнь